Пагалыме йолташ-влак, лудшына, ончышына-влак!
Уло тӱням чытырыктыше чер мемнан декат лӱдыкшым конден. Кеч-кунамат ме нелылыкыш логалаш огыл, туткар ынже лий манын, ончылгоч шекланаш тыршена. Лач тыгай ошкылым ыштыме таче: Республикыштына коронавирус деч кучедалме режимым увертарыме. Тидлан кӧра Марий Элыште чыла тӱшка мероприятийым эртараш чарыме. Чаманен увертарена: «Кугарня» газетын «Воштылаш, товатат, сулык огыл!» фестиваль-конкурсшо 31 мартыште Йошкар-Олаште, Сеҥымашын ХХХ идалыкше лӱмеш тӱвыра полатыште огеш лий. Лӱдыкшӧ эрта, чылажат сай лиеш гын, фестивальнам варарак эртараш шонена. Кызыт налме билет денак тушко пураш йӧным ыштена. Сандене кӧ билетым ончылгоч налын, ида тургыжлане, окса нигуш огеш йом. Чыла организационный йодышым тӧрлымеш, изиш вучалташ йодына. Ешартыш уверым кажныда деке намиен шукташ сӧрена.
Фестиваль-конкурсын отборочный туржо районлаштат огеш лий. Волжский районысо Приволжский ДК-ште (20 мартыште лийшаш ыле), У Торъял поселкысо ДК-ште (22 мартлан палемдыме) эртышаш мероприятийыш билетым ончылгоч кӧ деч налында, тудланак намиен пуыза да оксадам пӧртылтыза. Тау умылымыланда.
Ме ӱшанена: ты лӱдыкшӧ туткар мартежак ок шу, да ме тыгай пагытым куштылгын илен лектын, умбакыжат илышлан куанен илаш, шыргыжаш тӱҥалына.
Редакций.